16.01.2015ж. Заң газеті
Судьяның қызметі ешбір сыртқы өлшемдерге симайды. Ерекше лауазым иесінің шынайы бейнесін оның шығарған үкімдері мен шешімдерінің мән-мағынасы, ішкі иірімдері, түптеп келгенде, жеке тұлғаның ар-ожданы айқындайды.
Судья шешім шығарған кезде ешбір сыртқы ықпалдарға бой алдырмауы, құлақ түрмеуі тиіс. Заңда да солай жазылған. Мұндай кезде олардың ұстанымдары тек ар мен заң ғана болуы керек. Сонда ғана әділ шешім шығарып, әділетті іс тындырады.
Бірінші сатыдағы соттар мен апелляциялық сатыдағы сот судьяларының айырмашылықтары тәжірибесі мен біліктілігі ғана емес, өмір мектебі, қоғам сынынан өткен азаматтық бейнелерінде көрініс тапқан. Соттың жоғары тұрған сатысына ең білікті судьялар ғана өрлей алады.
Бүгінде ер тұғыры елуге қадам басқан Батыс Қазақстан облыстық сотының азаматтық және әкімшілік істер жөніндегі апелляциялық сот алқасының судьясы Есенбай Нұрлыбайұлы Боранбаевты жас күнінен білемін. Қасиетті Бөкейорда жеріндегі «Жетібай» ауылында, құмды өңірде туып- өскен. Көпбалалы қарапайым малшы әулеттің перзенті.
Оралдағы Махамбет Өтемісов атындағы мектеп-интернаттың 1982 жылғы саңлақ түлегі сол жылы Алматыдағы С.М.Киров атындағы Қазақ мемлекеттік университетінің заң факультетіне оқуға түсті. 1988 жылы жоғары оқу орнын ойдағыдай тәмамдап, туған өлкеге оралып, кәсіби қызметін Жәнібек ауданында мемлекеттік нотариустықтан бастады. Кешікпей Орал қалалық сотына аға заң консультанты болып қызметке ауысты. Ел тәуелсіздігінің бастапқы жылдары, нақтылап айтсақ, 1992 жылғы 19 ақпанда қалалық соттың халық судьясы болып сайланып, кейін облыстық соттың судьясы (1995), қылмыстық істер жөніндегі сот алқасының төрағасы (1999-2004) болып тағайындалып, қадағалау, кассациялық алқаларының судьясы қызметтерін абыроймен атқарды.
Қазақ, орыс тілдерін жетік меңгерген, біліміне біліктілігі сай судья қандай істі қараса да, шашасына шаң жұқтырмас жорғадай мәресіне мүлтіксіз жеткізген кездері көз алдымызда. Облыстық сотта судья болған бастапқы жылдарында өңірде аса зор қоғамдық серпіліс туғызған тапсырыспен кісі өлтіруге қатысты «Зенитте» қару жасағандар тобының ісін, «Босстың» ісін, «Томпақ оқиғасы» деген атпен елді елдеңдеткен алыстағы ауылда тұтастай бір отбасын жойып жіберген қаныпезерлердің, өңірдегі «Кәсіпкер әйелдердің ұйымдасқан тобы» дегенге қатысты атышулы сыбайлас жемқорлық қылмысын, қалалық саябақ маңында қыз баланы айуандықпен өлтірген қылмыс тобының басшысына қатысты қылмыстық істерді аса білгірлікпен қарап, әділ үкім шығарып, жұртшылықтың ризашылығына бөленгені де есімізде.
Бұдан екі жылдай бұрын үстінен қылмыстық іс көтерілген бұрынғы адвокат А.Мұхамбетовты сот залынан қамауға алу жөніндегі қаулысы қоғамда жаңғырық туғызды. Бірінші сатыдағы соттың судьясы алдын ала тергеу органдарының қылмысқа қатысы бар аталған тұлғаны қамауға алу жөніндегі ұсынысын жан-жақты зерттемей, күдікті адамды сот отырысына қатыстырмай үстірт шешім қабылдап жіберген. Ол тергеу органдары мен жәбірленушілер жағының наразылығын туғызып, жәбірленушінің заңды өкілінің шағымы бойынша арада апта өткенде Е.Боранбаевтың төрағалық етуімен облыстық соттың жабық отырысында қаралып, бұрынғы адвокат сот залынан тікелей қамауға алынды.
Дер кезінде алынған заңды шешімнің арқасында осы қылмыстық іс Батыс Қазақстан облысының қылмыстық істер жөніндегі мамандандырылған ауданаралық сотында қаралып, бөтен мүлікке құқықты алдау немесе сенімге қиянат жасау арқылы жасаған қылмысы үшін адвокат А.Мұхамбетов мүлкі тәркілене отырып, 4 жылға бас бостандығынан айырылды. Тіпті, оның сыбайласы да анықталып, пайда табу мақсатымен қасақана кісі өлтіруге оқталғаны үшін мүлкі тәркілене отырып, 14 жылға сотталды.
Бұдан екі-үш жыл бұрын аудан әкімдері тәртіптік кеңес пен прокуратураның ұсыныстары негізінде сыбайлас жемқорлықпен күрес деген желеумен лауазым иелерін жұмыстан заңсыз шығарып жіберуді үдетіп жіберді. Олардың кейбіреулерінің арты сотқа келіп тірелді. Осы кезде облыстық соттың азаматтық және әкімшілік істер жөніндегі апелляциялық сот алқасының судьясы болып тағайындалған Е.Боранбаевтың осындай мәністегі бірнеше істі қарауына тура келді.
Міне, солардың біреуі Аудан әкімінің өкімімен Жусандыой ауылдық округінің әкімі Талап Қазиев деген азамат сыбайлас жемқорлыққа жағдай туғызатын құқық бұзушылық жасады деген желеумен қызметінен босатылыпты Әкімнің мұндай шешім шығаруына аудандық прокуратура мен Қазақстан Республикасы Мемлекеттік қызмет істері агенттігінің Батыс Қазақстан облысы бойынша тәртіптік кеңесінің ұсыныстары негіз болған. Оқиға былай болған. 2013 жылғы 29 тамызда Жусандыой ауылдық округі әкімінің аппараты осы ауылға бюджет қаражатымен жарықтандыру қондырғыларын орнату мақсатында «Батысремстройпроект» жауапкершілігі шектеулі серіктестігімен мемлекеттік сатып алу шартын жасасады. 2013 жылғы 16 қазанда аудандық прокуратура жоспарлы тексеріс жүргізіп, жұмыс көлемі толық аяқталмағандығын, 280 000 теңге шамасындағы бюджет қаражаты 17 қыркүйекте мердігердің есепшотына толық аударылып жіберілгендігін көрсетіп, материалды тәртіптік кеңеске жолдайды. Тәртіптік кеңес өз шешімінде мәселеде жемқорлыққа жағдай туғызатын құқық бұзушылық белгісі бар деп табады да, аудан әкімі жоғарыда аталған өкімімен ауыл әкімін қызметінен босатып жібереді.
Жеке басы әлдебіреулермен ымыраласып, ішіп-жеп қоймаған, ауылына жағдай, жақсылық жасаймын деп жүріп, қара басы дауға қалған ауыл әкімі Т.Қазиев бірыңғай азаматтық істерді қарайтын Орал қалалық №2 сотына жүгініп, осы соттың 2014 жылғы 6 ақпандағы шешімімен талабы толық қанағаттандырылады. Қызметіне қайтадан орналастырылып, сот лауазымынан заңсыз босатылған уақыттағы 110 мың теңгеге жуық жалақысын толық өндіріп береді. Қалалық сот шешімімен келіспеген тәртіптік кеңес төрағасы да, прокуратура мен әкім де апелляциялық шағым түсірген еді. Судья Есенбай Боранбаевтың төрағалық етуімен Батыс Қазақстан облыстық сотының азаматтық және әкімшілік істер жөніндегі сот алқасы қалалық сот шешімін өзгертіп, тәртіптік кеңестің шағымы мен прокурордың наразылығын ішінара қанағаттандырып, Қаратөбе ауданы әкімінің шағымын қанағаттандырмай тастады. Аудан әкімі шын мәнінде мәселенің байыбына бармай, қадағалау органдарынан түскен ұсыныстарды қолма қол пәрменге айналдырып, ауыл әкіміне тәртіптік жаза қолдану туралы заңсыз өкім шығарған. Үстірттік бірінші сатыдағы соттан да кеткен. Сот ауыл атқамінерінің мүддесін қорғауға жарағанымен, іс үшін маңызы бар мән-жайлардың аясын дұрыс айқындамай, прокурор мен тәртіптік кеңестің ұсынбалы сипаттағы азаматтық сот ісін жүргізу тәртібімен қарауға жатпайтын шешімдері бойынша да билікті шырқыратып жіберген.
Апелляциялық сот осы жағдайлардың бәрінің ақ-қарасын ажыратып беріп, ешқандай жемқорлық сипаты жоқтығын нақты заң нормаларына сілтеме жасай отырып дәлелдеп, қалалық сот шешімінің ауыл әкімі Т.Қазиевті қызметіне қайтадан орналастырылып, лауазымынан заңсыз босатылған уақыттағы жалақысын өндіріп берген бөлігін күшінде қалдырды.
Судьялар әдебі жөніндегі комиссиясының мүшесі, жас буын судьяларға әрдайым қол- ұшын беріп, ақыл-кеңесін айтып, жол көрсетіп отырады. Оның жазған авторлық мақалаларына тәжірибелі сөз зергерлерінің батырып, елеулі түзетулер енгізе қоюы екіталай. Өйткені, Есақаң ерекше тұлға. Жалаң мақтанды сүймейді. Барлық істің де табиғи қисынмен жөнін тапқанын қалайды. Ал, өзі болса, заңдылықты қиыннан қиыстырады.
Біз білетін Есенбай халқымыздың дәстүрлі құқығына да ден қояды. 2008 жылы Орал қаласында оздырылған «Би соттарынан қазіргі заманғы сот төрелігі жүйесіне дейін» деген тақырыптағы халықаралық «дөңгелек үстелді» ұйымдастыруға белсенді қатысқаны үшін сол кездегі Қазақстан Республикасы Жоғарғы Сотының жанындағы Сот әкімшілігі жөніндегі комитетінің төрағасы И.Елекеевтің бұйрығымен «Сот жүйесінің құрметті қызметкері» белгісімен марапатталды.
Ол билердің бітімгершілік дәстүрін өркениет заңдарының қатарына қойып отырады. Бұл тұрғыда Есақаң қазақтың даңқты заңгері Салық Зимановты өзіне рухани ұстаз тұтады. Есенбай Малайсары бидің Сырым Датұлына: «Шырағым, үш сөз бар, соны ұмытпай жүрсең, халқың соңыңнан қалмас. Ұмытсаң, артыңа ермес. Ол үш сөз: ҰЯТ, БОРЫШ, ОБАЛ! Одан кейін бір ақылым: жақынды жаралама, алысты қаралама!», – деп берген батасын үнемі айтып, жазып, өзі де ұстанып келеді.
Сөз соңында облыстық соттың азаматтық және әкімшілік істер жөніндегі сот алқасының судьясы Есенбай Боранбаевты мерейлі жасымен құттықтай отырып, мәртебелі қызметіне сәттіліктер тілегіміз келеді.
Аманкелді ШАХИН
БАТЫС ҚАЗАҚСТАН ОБЛЫСЫ